Djúpavogsskóli heimsækir ,,Kjarval á Austurlandi" og Tækniminjasafn Austurlands

Nemendur Djúpavogsskóla í 4. - 7. bekk voru boðin á sýninguna ,,Kjarval á Austurlandi" á vegum Skaftfells á Seyðisfirði og í ,,Tækniminjasafn Austurlands" á Seyðisfirði. Þó ferðin hafi verið, vegna veðurs, aðeins lengri í tíma en var áætlað, var hún bæði skemmtileg og fróðleg, margt að sjá og gleðin og sköpunin lék á alls oddi. Og skemmtilegar ferðir eru ávallt gott hópefli. Nemendur stóðu sig vel, sungu hressilega á leiðinni og voru almennt til fyrirmyndar.

Kjarval á Austurlandi

er sýning á vegum Listasafns Íslands sem unnin hefur verið í samstarfi við Skaftfell, miðstöð myndlistar á Austurlandi. Á sýningunni eru landslagsmyndir frá Austurlandi eftir Jóhannes S. Kjarval (1885-1972), flestar úr fórum Listasafns íslands. Verkin á sýningunni spanna tímabilið frá 1919 - 1960.

Oft er sagt að þessi ástsæli listamaður hafi opnað augu Íslendinga fyrir sérstæðri fegurð landsins og þá ekki síst þeirri fegurð sem má finna við hvert fótmál.

Tækniminjasafn Austurlands

býður upp á sýninguna;

Búðareyri, saga umbreytinga. Lítil landræma með fjölbreytta sögu og mannlíf.

Sýningin fjallar um sögu Búðareyrar frá 1880 til dagsins í dag og þær umbreytingar í búsetu, atvinnulífi, samfélagi og náttúru sem þar hafa átt sér stað.

Breytingar sem segja ekki eingöngu staðbundna sögu heldur endurspegla jafnframt hluta af mun stærri sögu tækniframfara og mannlífsbreytinga síðust 150 árin á Íslandi og víðar.

Hópmynd við fallbyssuna úr El Grillo fyrir utan Tækniminjasafnið